غزة بالكَهربا بتمشي ومن غيرها "ماشية" .. والبني آدميين فيها "ماشية" .. وإذا بتسألني كيف الحال ؟ بحكيلَكْ "ماشية" .. هوّا فيه أحلى من عيشة "الماشية" ..!! السّيارة مش عَمْ تمشي .. والمصالحة مشْ عَمْ تمشي .. وهالبلد مش عَمْ يمشي .. أزمة مواصلاتْ ، وأزمة قيادة ، وأزمة أخلاقْ وأزمة كرنُبْ وأزمة ملفوف حتى الفسيخْ مأزوم وسعر كيلو البندورة في "غزة" ارتفع على حساب الخيار الوطني والخضار نار والمعابر سَكَّرَتْ والناس سكرانه ، وكما قال الشاعر الصّاحي ، ليسَ على السكران حَرَجْ ..! ويا حَرَج بفلوس بُكره "اتفاق كيري" بمصاري .. فِشْ اشي ببلاشْ إلاَّ العَمَى والطّراشْ وتحيا نقابة الطّراشينْ والدّهانيينْ وتحيا وحدة غزّة وبلعينْ وأنتَ يا رئيس الوزراء مالَكْ حزينْ سيأتي يوم ويرفع شبل من أشبال فلسطين السّكينة وتأتي الكهرباء على أطراف المدينة وتعود المُستحقات لمجاريها وجاري يا حموده وسلاماتي للحاجة أم فتحي والله يعطيها الصحة والتعليم والشؤونْ ولهونْ أعزائي بنكون اعملنا اللي علينا والباقي عَ الله .
منقول عن صفحة الكاتب أكرم الصوراني
